අග්‍රාමාත්‍ය ආචාර්ය හරිනි අමරසූරිය මෙනවිය ‘යුනෙස්කෝ’හි ඉහළ පෙළේ සමුළුවකට සහභාගී වීම සඳහා ප්‍රංශය බලා (31) පිටත්ව ගියාය.
අග්‍රාමාත්‍යවරිය ‘යුනෙස්කෝ‘ මූලස්ථානයේදී එහි අධ්‍යක්ෂ ජනරාල් ඕඩි්‍ර අසූලේ මහත්මියගේ සහභාගීත්වයෙන් පැවැත්වෙන ශ්‍රී ලංකාවේ අනුරාධපුර පූජනීය නගරයේ ලෝක උරුමය ආරක්ෂා කිරීම සඳහා ඒකාබද්ධ හා තිරසාර ප්‍රවේශයක් සහ ඒ ආශ්‍රිත ජීවන උරුමය පිළිබඳ ජාත්‍යන්තර විශේෂඥ සමුළුවේ සැසිවාරයකට අද (1) සහභාගී වීමට නියමිතය.
යුනෙස්කෝව ශ්‍රී ලංකාව සමඟ හවුල්කාරිත්වයෙන් සංවිධානය කරන මෙම සමුළුව, අතිවිශාල සංස්කෘතික හා ඓතිහාසික වැදගත්කමක් ඇති ‘යුනෙස්කෝ’ ලෝක උරුම අඩවියක් වන අනුරාධපුරය සංරක්ෂණය කිරීමට තිරසාර උපාය මාර්ග සාකච්ඡා කිරීම සඳහා ප්‍රමුඛ ජාත්‍යන්තර විශේෂඥයන් එක්රැස් වී පවත්වයි.
සමුළුවට සමගාමීව, ද්විපාර්ශ්වික සහයෝගීතාව සහ අන්‍යෝන්‍ය වශයෙන් උනන්දුවක් දක්වන ක්ෂේත්‍ර පිළිබඳ සාකච්ඡා කිරීම සඳහා අග්‍රාමාත්‍යවරිය ප්‍රංශ රජයේ ජ්‍යෙෂ්ඨ නියෝජිතයින් හමුවීමට ද නියමිතය.
අග්‍රාමාත්‍යවරිය සමග ශ්‍රී ලාංකික දූත පිරිසට බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා ඇතුළු නිලධාරීන් පිරිසක් ද ඇතුළත් වෙති.
ප්‍රංශ සංචාරය සම්බන්ධව අග්‍රාමාත්‍යවරිය සිය ෆේස්බුක් පිටුවේ මෙවැනි සටහනක් තබා තිබේ.
“ශ්‍රී ලංකාවේ අනුරාධපුර පූජනීය නගරයේ ලෝක උරුමය ආරක්ෂා කිරීම සඳහා ඒකාබද්ධ හා තිරසාර ප්‍රවේශයක් සහ ඒ ආශ්‍රිත ජීවන උරුමය ” මැයෙන් අප්‍රේල් 01 වැනිදා ප්‍රංශයේදී පැවැත්වෙන UNESCO ජාත්‍යන්තර විශේෂඥ සමුළු සැසිවාරය සඳහා සහභාගී වීම සඳහා ප්‍රංශයේ නිල සංචාරයක යෙදෙමින්..”
කෙසේ වුවත් සමාජ මාධ්‍ය තුළ අගමැති හරිනි අමරසූරිය ගේ මේ සංචාරය සම්බන්ධව ප්‍රතිචාර දක්වමින් ” හිටපු රාජ්‍ය නායකයන් විදෙස් සංචාර සිදුකරන විට, ජාතික ජනබලවේගය පක්ෂය සහ ජනතා විමුක්ති පෙරමුණ විපක්ෂයේ සිට එල්ල කළ විවේචන මතකද ” වැනි සටහන් තබා ඇත. ඇතැමුන් බංකොලොත්ව තිබූ රට එම තත්ත්වයෙන් මුදා ගැනීම සඳහා වූ හිටපු ජනාධිපති රනිල් වික්‍රමසිංහ ජාත්‍යන්තර නායකයන්ගේ සහාය ගැනීමට එවකට විදෙස් සංචාර වල නිරතවීමට වත්මන් ආණ්ඩුවේ පාර්ශ්ව විරෝධය දැක්වූයේ කුහකත්වය සහ රට තවදුරටත් කඩා වැටීම ඔවුන්ගේ පවිටු අපේක්ෂාව අනුව බවටද විවේචන එල්ල කර ඇත.
එහිදී එම සමාජ මාධ්‍ය ක්‍රියාකාරීන් පවසන්නේ ” වත්මන් විපක්ෂය ” දෙස බලා හෝ එවැනි කුහක ගති ලක්ෂයණ වෙනස් කරගන්නා ලෙසද ඇතමුන් අදහස් දක්වා තිබේ.
