ලබන ජූලි මාසේ සිට නියත වශයෙන්ම බස් ගාස්තු සැලකිය යුතු ප්‍රමාණයකින් වැඩි කිරීමට සිදුවන බව ලංකා පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා පැවසීය.
කොළඹදී අද (01) පැවති විශේෂ මාධ්‍ය සාකච්ඡාවකට එක්වෙමින් මේ බව පැවසූ ගැමුණු විජේරත්න මහතා කියා සිටියේ මේ වන විටත් බස් රථ ධාවනය කරනු ලබන්නේ පාඩු පිට බවයි.
” එළඹෙන සිංහල දෙමළ අලුත් අවුරුද්ද වන විට ඩීසල් මිල අඩුකරයි කියලා අප බලාපොරොත්තු වෙනවා. නමුත් වගකීමෙන් මම කියන්නේ තව මාස තුනකින් බස් ගාස්තු වාර්ෂික සංශෝධනය සිදුවීමට නියමිතයි එහිදී ගාස්තු අඩු කිරීම කෙසේ වෙතත් අනිවාර්යයෙන්ම බස් ගාස්තුව වැඩි කිරීමට සිදුවෙනවා.
බස් රථ හිමියන් මුහුණ පා ඇති මෙම ගැටලු සම්බන්ධව පසුගිය දා ප්‍රවාහන ඇමතිවරයා සමග ද අප සාකච්ඡා කළා. නමුත් ඒ ගැටළු වලට තවම විසඳුමක් ලැබී නැහැ. මේ තත්ත්වය මත ලබන ජූලි මාසය වන විට නියත වශයෙන්ම බස් ගාස්තු වැඩි කිරීමට සිදුවන බව ප්‍රවාහන ඇමතිවරයාට අපි දැනුම් දුන්නා.
අද වන විට බස් වලට වැට් බද්ධ ආදේශ කර තිබෙනවා බස් රථ මිල වැඩිවීම සේම අනෙකුත් සියලු පිරිවැය වැඩිවී තිබෙනවා පසුගිය වතාවේ ඩීසල් මිලය රුපියල් තිස් ගණනකින් අඩු ඉරිමත් සමඟ බස් ගාස්තු 4% අපි අඩු කළා. බස්කර්මාන්තය මුහුණපා තිබෙන තත්ත්වය මත තවත් ගාස්තු අඩු කිරීමට හැකියාවක් නැහැ.යැයි ගැමුණු විජේරත්න මහතා වැඩිදුරටත් සඳහන් කළේය.
