නුවරඑළිය තැපැල් කාර්‍යාලය තැපැල් කටයුතුම පමණක්ම සිදු නොකර සංචාරක කර්මාන්තයේ දියුණුවටද යොදා ගැනීමට අපේක්ෂා කරන බව අමාත්‍ය නලින්ද ජයතිස්ස පවසයි.
ඒ සඳහා නාගරික සංවර්ධන අධිකාරියේ සහ ශ්‍රී ලංකා තැපැල් දෙපාර්තමේන්තුවේත් සහාය ලබා ගැනීමට කටයුතු කරන බවද අමාත්‍යවරයා සඳහන් කළේය.
ඔහු මේ බව සඳහන් කර සිටියේ රජයේ ප්‍රවෘත්ති දෙපාර්තමේන්තුවේ අද (26) පැවති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමිනි.
නුවරඑළිය තැපැල් කාර්‍යාලය පසුගිය රජය විසින් විකුණා දැමීමට දරන ලද උත්සාහය මේ වන විට නවත්වා ඇති බවද අමාත්‍යවරයා සඳහන් කළේය.
කෙසේ වුවත් නුවරඑළිය තැපැල් කාර්‍යාලය සංචාරක ව්‍යාපාරය වෙනුවෙන් යොදාගැනීමේ අදහස හිටපු ජනාධිපති රනිල් වික්‍රමසිංහ විසින් ඉදිරිපත් කරනු ලැබූවකි. එවකට සඳහන් කෙරුණු ආකාරයට තැපැල් කාර්‍යාලයේ කටයුතු වෙනත් ස්ථානයකට ගෙන යාමට සහ විදෙස් සංචාරකයන්ගේ දැඩි ආකර්ෂණයක් හිමිවන ආයෝනයක් බවට දැනට පවතින තැපැල් කාර්‍යාලය යොදාගන්න සැලසුම් කර තිබිණ.
කෙසේ වුවත් තැපැල් වෘත්තීය සමිති ඊට විරෝධතා දැක්වූ අතර අනුර කුමාර දිසානායක ජනාධිපති වූ විගස පිහිටවූ ඇමති තිදෙනාගේ කැබිනට්ටුවට නියෝජනය කළ විජිත හේරත් පවසා සිටියේ නුවරඑළිය තැපැල් කාර්‍යාලය වෙනත් කිසිඳු කටයුත්තක් සඳහා නොදෙන බවය.
