මියන්මාරයට බලපෑ ප්‍රබල භූ කම්පනයෙන් සිදුවූ මරණ ගණන 1000 ඉක්මවා තිබෙන බවට විදෙස් මාධ්‍ය වාර්තා සඳහන් කරයි.
විදෙස් මාධ්‍ය වාර්තා අනුව මියන්මාරයේ පැරණි අගනගරයක් වූ මැන්ඩලේ ප්‍රදේශය කේන්ද්‍ර කරගනිමින් ඊයේ (28) එරට වේලාවෙන් ප.ව. 12:50ට පමණ ඇතිවූ මෙම භූ කම්පනයේ ප්‍රබලත්වය රික්ටර් මාපකයේ ඒකක 7.7ක් ලෙස සටහන් ව ඇත.
එම භූ කම්පනයෙන් මිනිත්තු කිහිපයකට පසු රික්ටර් මාපකයේ 6.4ක ප්‍රබලත්වයකින් යුත් පසු කම්පන තත්ත්වයක් ද ඇතිවී තිබේ.
මෙම භූ කම්පනවල ප්‍රබලත්වය අසල්වැසි තායිලන්තයේ බැංකොක් නුවරට ද දැනී ඇත.
මෙය වාර්තා අතරට එක්ව ඇත්තේ සියවසකට අධික කාලයකින් පසුව මියන්මාරයට බලපෑ ප්‍රබලතම භූ කම්පනය ලෙසය.
හමුදා පාලනය හේතුවෙන් දැනටමත් මානුෂීය අර්බුදයකට මුහුණ දී සිටින මියන්මාර වැසියන් භූ කම්පනයත් සමග දැඩි පීඩනයට ලක්ව සිටින බවද වාර්තා වේ.
භූ කම්පනයෙන් මියන්මාරයේ දෙවන විශාලතම නගරය වන මැන්ඩලේ නගරයට දැඩි හානි සිදුව ඇති අතර එහි ගොඩනැගිලි රැසක් පොළොවට සමතලා වී තිබේ.
මියගිය පුද්ගලයින්ගේ සිරුරු මේ වනවිට නගරයේ ගොඩගැසී ඇති අතර, තුවාලකරුවන්ගෙන් එරට රෝහල් පිරීගොස් ඇති බවද සඳහන් වෙයි.
කෙසේ නමුත් පසුකම්පන අවදානම හේතුවෙන් ඇතැම් පිරිස්හට ප්‍රතිකාර සිදු කෙරෙන්නේ රෝහල්වලින් පිටත තබා ගෙන බවත් ඊයේ පස්වරුවේ දී සිදුවූ ප්‍රධාන භූකම්පනයෙන් පසුව අද උදෑසන කාලය දක්වා මියන්මාරයට පසුකම්පන 14කින් ද බලපෑම් එල්ල වී ඇති බවත් සඳහන් ය.
කෙසේ වුවද මියන්මාරයේ පවතින දේශපාලනික අස්ථාවරත්වය හේතුවෙන් තොරතුරු යාවත්කාලීන වීම ප්‍රමාදවන අතර, මුදා ගැනීමේ මෙහෙයුම් ද දැඩි අභියෝගකාරී වී ඇතැයි සඳහන් වෙයි.
