දේශබන්දු තෙන්නකෝන් පොලිස්පති ධුරයට පත් කිරීම නීති විරෝධී බවත් එම ධුරයේ කටයුතු කිරීම අත්හිටුවමින් ශ්‍රේෂ්ඨාධිකරණය විසින් නියෝගයක් නිකුත් කර තිබියදී ඔහුව ධුරයෙන් ඉවත් කිරීමට ගෙන ඇවිත් තිබෙන විශ්වාසභංගය නිශ්ඵල කටයුත්තක් බවත්, එමඟින් පාර්ලිමේන්තුව ශ්‍රේෂ්ඨාධිකරණ තීන්දුවට අභියෝග කරන බවත් හිටපු අධිකරණ ඇමති විජයදාස රාජපක්ෂ සඳහන් කරයි.
ඔහු තවදුරටත් පොලිස්පති වශයෙන් කටයුතු නොකරන බව ඒ මහතා පෙන්වා දෙයි.
පාර්ලිමේන්තුවට එවන් විශ්වාසභංගයක් ඉදිරිපත් කළ හැක්කේ ඒ මොහොතේ ධුරය දරන පුද්ගලයකුට පමණක් බවද පැවසූ හිටපු අමාත්‍යවරයා වැඩිදුරටත් මෙසේද පැවසීය.
” දැන් ප්‍රශ්නය තියෙන්නේ හිටපු ජනාධිපතිවරයා විසින් දේශබන්දු තෙන්නකෝන් මහතා පොලිස්පති බවට පත් කළා. ඒ පත් කිරීමේදී ව්‍යවස්ථාදායක සභාවේ අනුමැතිය ගත් බවට කරුණු ඉදිරිපත් කළා. එහෙත් ශ්‍රේෂ්ඨාධිකරණය අතුරු නියෝගයක් මගින් ප්‍රකාශයට පත් කරලා තියෙනවා ඔහුගේ පත්වීම වලංගු නෑ කියලා. ඒ තත්ත්වය උඩ දේශබන්දු තෙන්නකෝන් මහත්මයා පොලිස්පතිවරයා නෙමෙයි. අධිකරණ නියෝගය තවමත් ක්‍රියාත්මක වෙනවා. ශ්‍රේෂ්ඨාධිකරණ නියෝගය එලෙසම පැවතෙද්දි පාර්ලිමේන්තුවේ මන්ත්‍රීවරු අත්සන් කරලා යෝජනාවක් භාර දෙනවා දේශබන්දු තෙන්නකෝන් මහත්මයා පොලිස්පති ධුරයෙන් ඉවත් කරන්න කියලා.
2002 අංක 5 දරණ පනත යටතේ එවැනි යෝජනාවක් ඉදිරිපත් කළ හැක්කේ එවකට ධුරය දරනු ලබන පොලිස්පතිවරයාට එරෙහිව පමණයි. ඒ අනුව ශ්‍රේෂ්ඨාධිකරණය විසින් ඔහු පොලිස්පතිවරයා නොවන බවට තීරණයක් තිබියදීත් පාර්ලිමේන්තුවේ මන්ත්‍රීවරුන් ඉදිරිපත් කරපු යෝජනාවක් කථානායකවරයා භාර අරගෙන තියෙනවා. මේක සම්පූර්ණයෙන්ම ආණ්ඩුක්‍රම ව්‍යවස්ථාවත් 2002 අංක 5 දරණ උසස් නිලධාරීන් ඉවත් කිරීමේ පනත යටතේ විධිවිධානවලටත් පටහැනියි.
යම් හෙයකින් ඔහුට විරුද්ධව තිබෙන දූෂණ චෝදනා සම්බන්ධව පරීක්ෂණයක් කරන්න ඕන වුණොත් ඒ සඳහා කමිටුවක් පත් කරන්න ඕනේ ඒ සඳහා කමිටුවේ සභාපතිවරයා වෙන්න ඕනේ ශ්‍රේෂ්ඨාධිකරණයේ විනිසුරුවරයෙක්. එතකොට ශ්‍රේෂ්ඨාධිකරණයෙන්ම නිඟමනයක් දීලා තියෙනවා පොලිස්පති නෙමයි කියලා. අනිත් පැත්තෙන් පරීක්ෂණයක් පවත්වනවා පොලිපති ධුරයෙන් ඉවත් කළ යුතුද කියලා. ඒ නිසා මේක පාර්ලිමේන්තුවෙන් විශේෂයෙන්ම කථානායකවරයා විසින් පාර්ලිමේන්තුවේ බලය සෑහෙන දුරට හෑල්ලුවට ලක් කිරීමක්. මොකද නීතියේ බලයක් නැති ක්‍රියාවක් තමයි ඔවුන් මේ සිදුකරන්න යන්නේ….”
