ක්‍රිෂ් ගනුදෙනුව සම්බන්ධයෙන් වන නඩුව හරහා පෙන්නුම් කරන්නේ වත්මන් ආණ්ඩුව රාජපක්ෂ පවුලට එරෙහිව දේශපාලන දඩයමක් දියත්කර තිබීමක් බව පාර්ලිමේන්තු මන්ත්‍රී නාමල් රාජපක්ෂ පවසයි.
ආණ්ඩුවේ අසාර්ථකත්වය ජනතාවගෙන් වසං කිරීමට මෙවැනි කටයුතු ඉවහල් වන බව ජාතික ජනබලවේගය ආණ්ඩුව විශ්වාස කරන බවක් පෙන්නු කෙරෙන බවද මන්ත‍්‍රීවරයා සඳහන් කරයි.
පාර්ලිමේන්තු මන්ත්‍රී නාමල් රාජපක්ෂ මේ බව සඳහන් කරමින් සිය x ගිනුමේ සටහනක් තබා ඇති අතර එහි මෙසේද සඳහන් වෙයි.
‘ක්‍රිෂ් සමාගම සම්බන්ධ නඩුව සම්බන්ධයෙන් ගරු නීතිපතිවරයා මට එරෙහිව චෝදනා පත්‍රයක් ගොනු කර ඇති බව මම මාධ්‍යවලින් කියෙව්වා.
යහපාලන ආණ්ඩුව සමයේ, මෙම කාරණය මුලින් විමර්ශනය කළ විට, මෙම කාරණය ගරු නීතිපතිවරයා වෙත යොමුකරන ලද්දේ වසර 8 කට පෙරය. වත්මන් ආණ්ඩුව යටතේ වසර 8 කට පසු අද අධිචෝදනා පත්‍රයක් ගොනුකර ඇත. වත්මන් ආණ්ඩුව රාජපක්ෂ පවුලට එරෙහිව දේශපාලන දඩයමක් දියත්කර ඇති බව පැහැදිලිය.
මම අධිකරණය කෙරෙහි විශ්වාසයෙන් සිටින අතර යුක්තිය ජය ගනු ඇතැයි විශ්වාස කරමි.
අපට එරෙහිව චෝදනා ගෙතීමෙන් රට පාලනය කිරීමේදී ඔවුන්ගේ අසාර්ථකත්වයන්ගෙන් අවධානය වෙනතකට යොමුකළ හැකි බවත්, ජනතාව මුහුණ දෙන බරපතල බර අඩුකර ගත හැකි බවත් ජාතික ජන බලවේග ආණ්ඩුව විශ්වාස කරන බව පෙන්නුම් කරයි. කෙසේවෙතත්, ඔවුන්ගේ අඩුපාඩු ඉක්මණින් සියල්ලන්ටම පෙනෙන පරිදි හෙළිවනු ඇත. රාජපක්ෂලාට පහර දීම පිටුපස ආණ්ඩුවට ඔවුන්ගේ අසාර්ථකත්වයන් දිගු කලක් සැඟවිය නොහැක.
යුක්තිය අන් සියල්ලටම වඩා ජයගනු ඇතැයි මම දැඩි ලෙස සහ අවංකව බලාපොරොත්තු වෙමි සහ විශ්වාස කරමි.’
