ශ්‍රී ලංකා ටෙලිකොම් ආයතනය (SLT) කළමනාකරණය සඳහා විදේශීය ආයෝජකයෙකු ගෙන්වා ගැනීමට ජාතික ජන බලවේගයේ (NPP) රජයක් සූදානම් බව ජාතික ජන බලවේගයේ ජනාධිපති අපේක්ෂක අනුර කුමාර දිසානායක මහතා අද(25දා) ප්‍රකාශ කළේය.
ජාතික ජන බලවේගයේ බැංකු සහ මූල්‍ය සංසදයේ දී අදහස් දක්වමින් ඔහු කියා සිටියේ NPP ශ්‍රී ලංකා ටෙලිකොම් විකිණීමට විරුද්ධ බවත් කෙසේ වෙතත් එය කළමනාකරණය කිරීමට විදේශීය ආයෝජකයෙකු ගෙන්වා ගැනීමට සිදුවන බවත්ය.
“අපි ශ්‍රී ලංකා ටෙලිකොම් ආයතනයේ ඉංජිනේරුවන් සමඟ සාකච්ඡා කළා. ටෙලිකොම් කියන්නේ තොරතුරු තාක්ෂණයට රට හදන තැන. ඒක විකුණනවාට අපි විරුද්ධයි. ටෙලිකොම් යනු නිරන්තරයෙන් වෙනස් වන අධි තාක්‍ෂණික කර්මාන්තයක් බැවින් එය කළමනාකරණය කිරීමට ප්‍රමාණවත් ධාරිතාවක් ටෙලිකොම් ආයතනයට නොමැති බව ඔවුන් පෙන්වා දුන්නා. එබැවින් එය කළමනාකරණය කිරීමට විදේශ ආයෝජකයෙකු ගෙන්වා ගැනීමට අපට සිදුවනු ඇත. “ඔහු පැවසීය.
රට සංවර්ධනය කිරීමට NPP සැලසුම් කර ඇති බව පැවසූ දිසානායක, එම සැලසුම් ක්‍රියාත්මක කිරීමට අවශ්‍ය නිපුණ මානව සම්පත් නොමැතිකම හේතුවෙන් ඔවුන්ට අභියෝගවලට මුහුණ දීමට සිදුවන බවද පැවසීය.
නව දැනුම හා කුසලතා රටට ගෙන ඒම අරමුණු කරගනිමින් සෑම වසරකම උසස් පෙළ සමත් සිසුන් 200ක් පමණ රජයේ වියදමින් විදේශ විශ්වවිද්‍යාලවලට යැවීමට NPP සැලසුම් කර ඇති බව ඔහු පැවසීය.
