හෝමාගම ප්‍රාදේශීය ලේකම් කොට්ඨාසයට අයත් ග්‍රාම සේවා වසම් 6 ක පදිංචිකරුවන්ට දැඩිව ගැටලුවක්ව පවතින මුව ගහණයට ස්ථිරසාර පිළියම් යෙදීමට අවශ්‍ය කටයුතු ඉක්මනින් සිදු කරන බව කොළඹ දිස්ත්‍රික් පාර්ලිමේන්තු මන්ත්‍රී හෝමාගම සම්බන්ධීකරණ කමිටු සභාපති අරුණ පනාගොඩ පවසයි.
ඒ අනුව මෙම මුවන් වනජිවී දෙපාර්තමේන්තුවේ නිලධාරීන්ගේ මූලිකත්වයෙන් යුද්ධ හමුදා හට කණ්ඩායමක් මෙන්ම ප්‍රදේශවාසීන්ගේ සහයෝගයෙන් අල්ලාගෙන සුදුසු අභය භූමියකට මුදා හැරීම සඳහා තව නොබෝ දිනකින්ම අවශ්‍ය කටයුතු සම්පාදනය කරන බවද මන්ත්රීවරයා වැඩිදුරටත් පැවසීය.
මන්ත්රීවරයා මේ බව සඳහන් කර සිටියේ හෝමාගම ප්‍රදේශයේ නිරීක්ෂණ චාරිකාවකින් අනතුරුවය.
හෝමාගම උතුර, හෝමාගම නැගෙනහිර, මුල්ලේගම, හබරකඩ, පිටිපන සහ මාවත්ගම ග්‍රාම සේවා වසම්වල වසර 10 කට පමණ ඉහතදී සැරිසැරූ කුඩා මුව රංචුවකින් මේ වන විට මුවන් විශාල පිරිසක් බෝවී කෘෂිකර්මාන්තයෙන් දිවිගෙවන නාගරික ප්‍රදේශයක් වන හෝමාගම වැසියන් ගේ කුඹුරු ගොවිතැන් සේම ගෙවතු වල බෝග වගාවන් මුවන්ගේ ග්‍රහණයට දැඩිව නතුවීම හේතුවෙන් එම සතුන් එම පදිංචිකරුවන්ගේ ජන ජීවිතයට දැඩි ගැටලුවක් බවට පත්ව ඇති බවද මන්ත්රීවරයා සඳහන් කළේය .
