බරපතල වැඩ සහිත වසර 16 කට සිර දඬුවම් නියම වූ උතුරු මැද පළාතේ හිටපු මහ ඇමති එස් .එම් රංජිත් සහ ඔහුගේ පුද්ගලික ලේකම් ශාන්ති චන්ද්‍රසේන යන අය මහා අධිකරණය ලබා දුන් තීන්දුවට එරෙහිව අභියාචනා අධිකරණය වෙත අභියාචනයක් ඉදිරිපත් කර ඇත.
තමන්ට අදාළ නඩුව විභාග කිරීමේ දී තමන් විසින් ඉදිරිපත් කළ කරුණු මහාධිකරණ විනිසුරුවරයා විසින් සිය තීන්දුව ලබාදීමේදී සැලකිල්ලට ගෙන නැති බවත් තමන් අදාල චෝදනා වලින් නිදොස් කොට නිදහස් කරන ලෙසත් පෙත්සම්කරුවන් ඉල්ලා තිබේ.
2012 වසරේ සැප්තැම්බර් 27 වැනිදා සහ 2014 දෙසැම්බර් 31 අතර කාලසීමාව තුළ විත්තිකාර එස්.එම් රංජිත් එම පළාත් සභාවේ ප්‍රධාන අමාත්‍යවරයා ලෙස කටයුතු කරමින් සිටියදී ප්‍රධාන අමාත්‍යවරයාගේ පෞද්ගලික ලේකම්වරිය වැටුප් සමග ඉන්ධන දීමනාවක් ඇයට ලබා දී එය අභිබවා නීති විරෝධී ලෙස ඉන්ධන දීමනා වශයෙන් රුපියල් ලක්ෂ 26 කට අධික ඉන්ධන ලබා ගැනීම සහ ඊට ආධාර අනුබල දීම සම්බන්ධයෙන් එස්.එම් රංජිත් සහ ශාන්ති චන්ද්‍රසේන යන අයට එරෙහිව අල්ලස් හෝ දූෂණ විමර්ශන කොම්ෂන් සභාව 2021 වසරේදී මෙම නඩුව පවරා තිබිණි.
