පසුගිය සමයේ සාම්පූර් බලාගාරය ඉදිකිරීමට යන විට එම ජාතික ව්‍යාපෘතිය වත්මන් ජාතික ජනබලවේගය පක්ෂයේ නායකයන් කඩාකප්පල් කළ නමුත් ඔවුන්ටම ඉන්දීය අගමැති නරේන්ද්‍ර මෝදි ගෙන්වා එම ව්‍යාපෘතියේ කටයුතු එම ස්ථානයේම ආරම්භ කරමින් සම්පූර්ණයෙන් කණපිට හැරීමට සිදුව තිබෙන බව හිටපු පාර්ලිමේන්තු මන්ත්‍රී තිස්ස අත්තනායක පවසයි.
සාම්පූර් බලාගාරය පසුගිය 2017දී සෑදීමට ගිය අවස්ථාවේදී ජාතික ජනබලවේගය පක්ෂයේ නායකයන් එය කඩාකප්පල් කර, විරෝධතා දක්වමින් පෙළපාලි ගිය බව ද සිහිපත් කළ හිටපු මන්ත‍්‍රීවරයා , එදා සාම්පූර් ඉදිකරන්නට ඉඩ දුන්නා නම් අද රටේ විදුලි බල අර්බුදයට විසඳුම ලැබෙන්නට තිබූ බවද පෙන්වා දුන්නේය.
හිටපු පාර්ලිමේන්තු මන්ත්‍රි තිස්ස අත්තනායක මේ බව සඳහන් කර සිටියේ කොළඹ පැවති මාධ්‍ය හමුවකදී ය.
එහිදී මන්ත‍්‍රීවරයා වැඩිදුරටත් සඳහන් කර සිටියේ ජාතික ව්‍යාපෘති, ආයෝජන, ආර්ථික ප්‍රතිසංස්කරණ කඩාකප්පල් කළ එන්.පී.පී. නායකයන් අද බලය ලබාගෙන එම ව්‍යාපෘති ක්‍රියාත්මක කරන බව කීම දෛවෝපගත නමුත් එවක ව්‍යාපෘති කඩාකප්පල් කිරීම හේතුවෙන් රට ආපස්සට ගොස් ඇති බවයි.
“රටේ ජාතික සම්පත් ඉන්දියා- ලංකා සමාගමක් හදා විකුණා දැමීමට උත්සාහ කරන බැවින් ඊට ඉඩ නොදෙන බවට” ටිල්වින් සිල්වා පසුගිය සමයේ දී සිදුකල ප්‍රකාශයක් ද හිටපු මන්ත‍්‍රීවරයා විසින් සිහිපත් කර සිටියේ ය.
එසේම ජේ.ආර්. ජයවර්ධන සමයේ නිදහස් වෙළෙඳ කලාප ආරම්භ කරන විට රෝහණ විජේවීර ද පෙළපාලි ගිය බව ඔහු සඳහන් කළේය .
එමෙන්ම ත්‍රිකුණාමලය තෙල් ටැංකි හා ඉන්දියාව හා ලංකාව අතර ඉදිකිරීමට යෝජිත තෙල් නළ පද්ධතිය ගැන පුදුම හිතෙන විවේචනයන් එන්.පී.පී නායකයන් කළ බව ද සඳහන් කළ හිටපු පාර්ලිමේන්තු මන්ත්‍රී තිස්ස අත්තනායක ත්‍රිකුණාමලය තෙල් ටැංකි මීට අවුරුදු 20කට 30කට පෙර ප්‍රයෝජනයට ගැනීමට තිබූ අවස්ථාව ඔවුන් නැති කළ බවද පෙන්වා දුන්නේය.
ජේ.වී.පී නායකයන් හා කණ්ඩායම එම කටයුතු සිදුකළ බවත්, එමඟින් වැරදි මත රටට යැවූ බවත් කී හිටපු පාර්ලිමේන්තු මන්ත්‍රිවරයා, එම පිරිස් කල් ගිහින් හෝ යථාර්ථයට පැමිණීම හොඳ බවත් පැවසීය.
එසේම ඔවුන් ජනතාව රැවැට්ටුවා කෙළින් කිවයුතු බවද හිටපු මන්ත‍්‍රීවරයා අවධාරණය කර සිටියේය.
