ජනවාරි මස 01 වැනිදා සිට ක්‍රියාත්මක කරන ලද එකතු කළ අගය මත බදු (VAT) අනුපාත වැඩිවීම විදුලි ගාස්තුවලට කිසිදු බලපෑමක් සිදු නොකරන බව ලංකා විදුලිබල මණ්ඩලය (ලංවිම) පැහැදිලි කර තිබෙනවා.
මීට පෙර අවස්ථාවක ලංකා විදුලිබල මණ්ඩලය ප්‍රකාශ කළේ වැට් බදු සංශෝධනය විදුලි ගාස්තුවලට බලපාන්නේද යන්න පිළිබඳව මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය සහ මහා භාණ්ඩාගාරය ඇතුළු අදාළ ආයතනවලින් පැහැදිලි කිරීමක් බලාපොරොත්තුවෙන් සිටින බවයි.
එවැනි පැහැදිලි කිරීමක් මෙතෙක් ලැබී නොමැති නමුත් ලංකා විදුලිබල මණ්ඩලයේ මාධ්‍ය ප්‍රකාශක, ඉංජිනේරු නොයෙල් ප්‍රියන්ත මහතා කියා සිටියේ මීට ප්‍රථම මුදල් අමාත්‍යාංශය සහ භාණ්ඩාගාරය වැට් බදු වැඩි කිරීම විදුලි ගාස්තුවලට බලපාන්නේ නැති බව ලංකා විදුලිබල මණ්ඩලයට දන්වා තිබූ බවයි.
කෙසේ වෙතත්, මේ මස අග වන විට (ජනවාරි) විදුලි ගාස්තු සංශෝධනය කිරීමට බොහෝ දුරට ඉඩ ඇති අතර, ඒ සඳහා අනුමැතිය ලබා ගැනීම සඳහා ශ්‍රී ලංකා මහජන උපයෝගිතා කොමිෂන් සභාව (PUCSL) වෙත යොමු කිරීමට ලංවිම විසින් ගාස්තු සංශෝධන යෝජනාවක් සකස් කර තිබෙනවා.
ඉංජිනේරු නොයෙල් ප්‍රියන්ත මහතා මීට පෙර අවස්ථාවක කියා සිටියේ අදාළ යෝජනාව ජනවාරි 15 හෝ ඊට පෙර මහජන උපයෝගිතා කොමිෂන් සභාව වෙත යොමු කරන බවත්, සිදුවිය හැකි ගාස්තු සංශෝධනය ගාස්තු අඩු කිරීමක් වීමට බොහෝ දුරට ඉඩ ඇති බවයි.
