වර්ෂ 2022 සහ 2023 කාලසීමාවේ මෙරටට ඉන්ධන ගෙන්වීමේදී සිදුවූ අක්‍රමිකතා පිළිබඳ වහාම පරික්ෂණයක් පවත්වන්නැයි ලංකා ඛනිජ තෙල් නීතිගත සංස්ථාව සහ තොග ගබඩා සමාගමේ සභාපති ඩී. ජේ. රාජකරුණා මහතා ජනාධිපති අනුර කුමාර දිසානායක මහතාගෙන් ඉල්ලීමක් කර තිබේ.
පසුගිය ඔක්තෝබර් මස 16 වැනි දින තමා ලිඛිතව ජනාධිපතිවරයාට මේ බව දැනුම් දීමත් සමඟ ජනාධිපති ලේකම් ආචාර්ය නන්දික සනත් කුමානායක මහතා අපරාධ පරික්ෂණ දෙපාර්තමේන්තුවට මෙම පරීක්ෂණය කඩිනමින් සිදු කරන්නැයි දැනුම්දී තිබේ.
එම දැනුම්දීමත් සමඟ ක්‍රියාත්මක වූ අපරාධ පරික්ෂණ දෙපාර්තමේන්තුවට දැනටමත් තමාගෙන් මූලික කරුණු විමසීමක් කරමින් කටඋත්තර ලබා ගත් බව ලංකා ඛනිජ තෙල් නීතිගත සංස්ථාවේ සහ තොග ගබඩා සමාගමේ සභාපති ඩී.ජේ.රාජකරුණා මහතා ප්‍රකාශ කළේය. අපරාධ පරික්ෂණ දෙපාර්තමේන්තුව සිදුකරන පරික්ෂණවලට අමතරව තමා විසින් සංස්ථාවේ ගනු-දෙනු පිළිබඳ වෝහාරික විගණනයක් සිදු කිරීමට කටයුතු කරන්නැයි දැනුම්දී ඇතැයිද සභාපතිවරයා සඳහන් කළේය.
මෙරට ඉතිහාසයේ පළමු වතාවට ශ්‍රී ලංකා ආර්ථිකය මුහුණ දුන් දැඩි අර්බුද හමුවේ සමස්ත රටම බංකොලොත් භාවයට පත් වී ඇති බව වසර 2022දී නිවේදනය කළ බවත් ඉන් අනතුරුව සංස්ථාවද බංකොලොත් භාවයට පත්ව පිටරටින් ඉන්ධන ගෙන්වීමට අවශ්‍ය විදේශ විනිමය නොමැතිව ඉන්ධන පෝලිම් නිර්මාණය වූ බවත් සභාපතිවරයා සිහිපත් කළේය. මෙවැනි අවාසනාවන්ත තත්ත්වයක් රටේ මතුව තිබියදීත් එවකට හිටපු බලධාරීන් අර්බුදය වසන්තයක් කර ගනිමින් මුදල් උපයාගෙන ඇති බවට නැගෙන චෝදනාවල සත්‍ය අසත්‍යතාව සොයා බැලීම සහ ඒවාට සම්බන්ධ වූවන්ට දඩුවම් පැමිණවීම සඳහා නීතිමය ක්‍රියාමාර්ග ගැනීමේ වැදගත්කම ද සභාපති පෙන්වා දෙයි.
