මොරටුව ප්‍රදේශයේ දේවස්ථානයක් අසල රාජකාරියේ නිරතව සිටි පොලිස් නිලධාරීන් දෙදෙනෙකුට පිරිසක් පහරදීමේ සිද්ධියක් සම්බන්ධව පුද්ගලයින් හය දෙනෙකු මොරටුව පොලිසිය විසින් ඊයේ (19) රාත්‍රියේ අත්අඩංගුවට ගැනීමත් සමඟ එහි දැඩි නොසන්සුන්තාවයක් හට ගනු ලැබීය.
පහර කෑමෙන් තුවාල ලැබූ පොලිස් නිලධාරීන් දෙදෙනා ප්‍රතිකාර සඳහා පානදුර රෝහලට ඇතුළත් කරනු ලැබ ඇත.
මොරටුව ප්‍රධාන මාර්ගය ඉදිරිපිට දේවස්ථානයක මාර්ගය අවහිර වන ආකාරයට පිරිසක් සැරසිලි කරමින් සිටියදී එම ස්ථානයට පැමිණි මොරටුව පොලිසියේ රථවාහන අංශයේ නිලධාරීන් දෙදෙනෙකු ඔවුන්ට එම සැරසිලි ඉවත් කර ගන්නා ලෙස දැනුම් දීමත් සමඟ දෙපාර්ශවය අතර ඇති වූ වචන හුවමාරුවකින් පසු එහි සිටි පිරිස පොලිස් නිලධාරීන් දෙදෙනාට පහර දී ඇත.
පහරදීම සිදුකළ පුද්ගලයන් අත්අඩංගුවට ගැනීමත් සමඟ ප්‍රදේශවාසීන් සියයක් පමණ මොරටුව නගරයට පැමිණ උද්ඝෝෂණය කිරීම හේතුවෙන් ඊයේ රාත්‍රියේ මොරටුව නගරය සහ පොලිස් ස්ථානය අසල දැඩි නොසන්සුන් තාවයක් හටගෙනතිබිණි.
මෙම තත්ත්වය පාලනය කිරීම සඳහා පොලිසිය සහ පියතුමන්ලා රැසක් දැඩි උත්සාහයක නිරත වූහ.
