තමන්ව අත්අඩංගුවට ගැනීම සඳහා මාතර මහේස්ත්‍රාත්වරයා විසින් නිකුත් කරන ලද වරෙන්තුව අත්හිටුවීමේ නියෝගයක් නිකුත් කරන ලෙස නියෝගයක් ලබා දෙන ලෙස පොලිස්පති දේශබන්දු තෙන්නකෝන් විසින් ගොනු කරන ලද රිට් පෙත්සම පිළිබඳ නියෝගය ලබාදීම අභියාචනාධිකරණය මාර්තු 17 වන දින දක්වා කල් තැබීය.
ඒ අදාළ පෙත්සම අද (12) සලකා බැලූ අවස්ථාවේදීය .
එහිදී දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා පවසා ඇත්තේ මහේස්ත්‍රාත්වරයාගේ අත්අඩංගුවට ගැනීමේ නියෝගය නීතිමය විධිවිධානවලට පටහැනිව සහ තම සේවාදායකයාගෙන් ප්‍රකාශයක් සටහන් කර නොගෙන නිකුත් කර ඇති බවය.
මෙහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් ජනාධිපති නීතිඥ දිලීප පීරිස් අධිකරණයට දන්වා සිටියේ හෝටල් හිමිකරු ඉලක්ක කර වෙඩි තැබීමකට තුඩු දුන් වැලිගම හෝටල් මෙහෙයුම මෙහෙයවා ඇත්තේ දේශබන්දු තෙන්නකෝන් බවය.
මාතර මහේස්ත්‍රාත් අධිකරණ කටයුතුවලට අදාළ කරුණු යටපත් කිරීම සම්බන්ධයෙන් දේශබන්දු තෙන්නකෝන් විසින් ඉදිරිපත් කර ඇති චෝදනාව උපුටා දක්වමින් පෙත්සම නිෂ්ප්‍රභ කරන ලෙසද ඔහු අධිකරණයෙන් තවදුරටත් ඉල්ලා සිටියේය.
