මෙවර කන්නයේ දී වී මෙට්‍රික් ටොන් මිලියන 26ක අස්වැන්නක් අපේක්ෂා කරන අතර එය මිලදී ගැනීමට නම් රුපියල් බිලියන 325ක් අවශ්‍ය නමුත් රජය වී මිලදී ගැනීමට රුපියල් බිලියන 5ක් වෙන්කර කයිවාරු ගසන බව කෝටිපති ව්‍යාපාරිකයකු මෙන්ම මෙරට ප්‍රමුඛතම මහා පරිමාණම සහල් මෝල් හිමියා වන ඩඩ්ලි සිරිසේන පවසයි.
දේශපාලනඥයින් තම නොහැකියාව, බැරිකම , නොදැනුවත්කම වහගන්න සහල් මාෆියාව කියා චෝදනා නඟන බවද ඔහු පවසයි.
ඩඩ්ලි සිරිසේන මේ බව සඳහන් කර සිටියේ ව්‍යාපාරික ප්‍රජාව සහ ආර්ථික විශ්ලේෂකයන් සමඟ කොළඹ සංවිධානය කර තිබූ පශ්චාත් අයවැය සංවාද සභාවකදී අදහස් දක්වමිනි.
එහිදී ඔහු මෙසේද පැවසීය.
මම හිටපු ජනාධිපතිවරයෙකුගේ මල්ලි කෙනෙක්. ඒ නිසා වැඩ සිද්ධවෙන විදිහ ගැන දන්නවා. මේ හැම දේශපාලනඥයකුටම රටේ ප්‍රශ්න විසඳන්න නෙවෙයි ඕන. රටේ ප්‍රශ්න ඇතිකරන්නයි ඕන. රටේ කන්න සහල් නෑ, පොල් නෑ, මොකක්ද මේ ? මාෆියාව කියලා තමන්ගේ නොහැකියාව, බැරිකම , නොදැනුවත්කම වහගන්න හදනවා. දැන් බලන්න පෞද්ගලික අංශයේ සේවක වැටුප් වැඩිවීම රුපියල් 30000ක් කියන්නේ මොකක්ද ? රුපියල් 30000ක් දීලා මිනිස්සු තියාගන්න පුළුවන් ද ? ඕක අයවැයෙන් කියන්න දෙයක්ද ? මොනවද මේ මෝඩ කතා ?
මේ කන්නයේ වී මෙට්‍රික් ටොන් මිලියන 26ක් බලාපොරොත්තු වෙනවා. එය මිලදී ගැනීමට නම් රුපියල් බිලියන 325ක් අවශ්‍යයි. රජය බිලියන 5ක් වෙන් කරලා අපිට පාට් එක දානවා. හාල් මාෆියාව නවත්වන්න කයිවාරු ගහනවා.
