නියෝජ්‍ය ඇමති නලින් හේවගේ විසින් ඊයේ දින පාර්ලිමේන්තුවේදී සිදු කරන ලද ප්‍රකාශයක් සම්බන්ධයෙන් ජාතික ජන බලවේග පාර්ලිමේන්තු මන්ත‍්‍රී කෞශල්‍යා ආරියරත්න විරෝධය පළ කරයි.
තම සමාජ ජාල ගිණුමේ සටහනක් තබමින් ඇය පෙන්වා දෙන්නේ පාර්ලිමේන්තුව තුළදී කාන්තාවක් සම්බන්ධයෙන් සිදුකළ ප්‍රකාශයන් තමන් පෞද්ගලිකව අනුමත නොකරන බවය.
එහිදී ඇය මෙසේ සඳහන් කර තිබේ.
“අද මම සභා ගර්භයේ සිටියේ නැහැ. කතා අතරතුර විපක්ෂ මන්ත්‍රීවරියක සම්බන්ධයෙන් ‘පාර්ලිමේන්තු විරෝධී’ භාෂාව භාවිතා කිරීම ගැන මම පසුව දැන ගත්තා. ස්ත්‍රීවාදී මූලධර්ම වෙනුවෙන් ස්ථිරව පෙනී සිටින කාන්තාවක් ලෙස, පාර්ලිමේන්තුවේ සිදු වූ දේ මට පෞද්ගලිකව අනුමත කළ නොහැක.
අපි මෙහි සිටින්නේ සුපිළිපන්බව, ගෞරවය සහ අප දිගු කලක් සටන් කළ වටිනාකම් තුළ මුල් බැසගත් දේශපාලන සංස්කෘතියක් ගොඩනැගීමටයි. මෙම මූලධර්ම කෙරෙහි මගේ කැපවීම කිසිදා නොවූ තරම් ශක්තිමත්ව පවතී”
– ආචාර්ය කෞශල්‍යා ආරියරත්න
