භූ කම්පනයෙන් විපතට පත් ජනතාවට සහන සැලසීම සඳහා මෙරට වෛද්‍ය කණ්ඩායමක් මියන්මාරයට යැවීමට සූදානම් කළ බව අමාත්‍ය නලින්ද ජයතිස්ස පැවසීය.
මියන්මාර රජය දැනුම් දුන් පසු අදාළ වෛද්‍ය කණ්ඩායම පිටත්කර හැරීමට සූදානම් බවද ඔහු සඳහන් කළේය.
නලින්ද ජයතිස්ස අමාත්‍යවරයා මේ බව සඳහන් කර සිටියේ කළුතර ප්‍රදේශයේ දී මාධ්‍ය හමුවක් පවත්වමිනි.
එහිදී ඔහු මෙසේද පැවසීය .
” මේ වෙලාවේ මියෙන්මාර් භූමිකම්පාවෙන් විපතට පත්වූවාට පසුව, ඔවුන්ට වෛද්‍ය සහාය අවශ්‍ය කරනවා. ඒ අනුව අපි මෙවැනි අවස්ථාවලදී අත්දැකීම් සහිත විශේෂඥ වෛද්‍යවරු කිහිපදෙනෙකු සහිතව වෛද්‍ය හෙද සෞඛ්‍ය කණ්ඩායමක් දැනටමත් සුදානම් කරලා තියෙන්නේ. මෙය අපි විදේශ කටයුතු අමාත්‍යාංශය හරහා මියන්මාර තානාපති කාර්යාලයට දැනුම් දුන්නා. ඔවුන් කිව්වා සුදානම් කර තබාගන්න අවශ්‍ය වූ වහාම ඒ බව දැනුම් දෙන බව. ඒ අනුව පණිවුඩයක් ලැබෙන තුරු අවශ්‍ය සහාය ලබාදීමට බලාපොරොත්තුව ඉන්නවා.”
කෙසේ වුවත් මියෙන්මාර් භූ කම්පනය හේතුවෙන් සිදුවූ විනාශය වාර්තා වූ සැනින් ක්‍රියාත්මක වූ හිටපු ජනාධිපති රනිල් වික්‍රමසිංහ ආණ්ඩුවට දැනුම්දී සිටියේ කඩිනමින් මියෙන්මාරය වෙත සහායක වෛද්‍ය කණ්ඩායමක් යවන ලෙසය.
විශේෂ ප්‍රකාශයක් සිදුකරමින් හිටපු ජනාධිපතිවරයා මේ දැනුම්දීම සිදුකළ අතර එහිදී මියෙන්මාර් – ශ්‍රී ලංකා ඓතිහාසික සබඳතා ද ඔහු සිහිපත් කර සිටියේ ය.
මේ සම්බන්ධව අදහස් දැක්වූ ජ්‍යෙෂ්ඨ මාධ්‍යවේදියෙක් සඳහන් කර සිටියේ අසල්වාසී ආසියානු රටක් වුවත් මියෙන්මාර් ඛේදවාචකය අවස්ථාවේ ඊට සහන සැපයීමට ලංකා රජය කඩිනම් නොවූ බවයි.
ජාත්‍යන්තර සබඳතා විෂයෙහි වත්මන් ආණ්ඩුවේ අපරිණත බව එයින් තහවුරු වන බවත් පෙනෙන්නට ඇති ආකාරයට හිටපු ජනාධිපති විශේෂ ප්‍රකාශයක් සිදුකරමින් මියෙන්මාර් වෙත සහායක වෛද්‍ය කණ්ඩායමක් යවන ලෙස ආණ්ඩුවෙන් ඉල්ලා සිටීමෙන් පසුව , එහි බලපෑමෙන් මිදීමට මෙන් ආණ්ඩුව ප්‍රමාදවී හෝ මේ ලෙස ක්‍රියාත්මක වීම වැදගත් බවත් ඔහු වැඩිදුරටත් සඳහන් කළේය .
