පොරොන්දුවූ ආකාරයට ජාතික ජනබලවේගය ආණ්ඩුව විසින් ඇප නැතිව ණය ගැනීමට හැකි ක්‍රමය සකසා ඇති බවත් ඒ අනුව තරුණ ව්‍යවසායකයෙකුට තමන්ගේ ව්‍යවසායක සැලසුම පෙන්වා කර්මාන්ත අමාත්‍යංශය සමඟ එකාබද්ධවී සහතිකය ගැනීමෙන් පසුව ඇප රහිත ණයක් ගැනීමට හැකි බවත් ජනාධිපති අනුර දිසානයක පවසයි.
ඇප රහිත ණයක් ගැනීමෙන් අලුත් ව්‍යාපාරයක් ආරම්භ කිරීමට තරුණයන්ට හැකි බවද ජනාධිපතිවරයා සඳහන් කළේය.
ඔහු මේ බව සඳහන් කර සිටියේ ජාතික ජන බලවේගය විසින් පළාත් පාලන ඡන්දය වෙනුවෙන් අද (29) බෙලිඅත්ත ප්‍රදේශයේ සංවිධානය කර තිබූ ජන හමුවක් අමතමිනි.
කෙසේ වුවත් පසුගිය මැතිවරණ සමයේ ජාතික ජනබලවේගය පක්ෂය විසින් මෙම යෝජනාව පිළිබඳව සඳහන් කරන විට, ඊට ප්‍රතිචාර දක්වමින් මහ බැංකු අධිපති නන්දලාල් වීරසිංහ පවසා සිටියේ ඇප නැතුව ණයක් දීමට නම් කිසියම් පාර්ශ්වයක් ඇප සහතික කළ යුතුව ඇති බවයි.
ඒ අනුව රජය එවැන්නක් සිදු කරනවා නම් රජය විසින් ඇප සහතික කළ යුතු බවත්, ණය ලාභීන් ණය නොගෙවා සිටියහොත් ජනතා බදු මුදල් වැයකර එම මුදල් පියවීමට සිදුවන බවත් මහ බැංකු අධිපතිවරයා එහිදී සඳහන් කළේය .
එසේම බදු ගෙවන ජනතාව ඊට එකඟ නම් ගැටළුවක් නොමැති බවද ඔහු වැඩිදුරටත් පැවසුවේය.
මේ සම්බන්ධව කරුණු පහදන මූල්‍ය – ආර්ථික විශ්ලේෂකයන් පවසන්නේ අඩු පොලී හෝ පොලී රහිත ණයක් දීම ලංකාව වැනි රටකට සුදුසු නමුත් ඇප නොමැතිව ණය දීම අවධානමක් බවයි. එහිදී කිසියම් හෝ අවධානමක් මතුවුණහොත් රජයට ඒ මුදල දැරීමට සිදුවන බව අනිවාර්යයක් බවත් මෙබඳු තීරණ ජනප්‍රිය නමුත් කොතරම් යෝග්‍යද යන්න යළි සලකා බැලීමට අවශ්‍ය බවද ඔවුන්ගේ මතය වී තිබේ.
කෙසේ වුවත් ව්‍යවසායකත්වය වර්ධනය කරන කටයුත්තක් උපන් ගෙයි මරණයට පත්කිරීමේ අපේක්ෂාවක් තමන්ට නැති බැවින් මෙකී යෝජනාව ක්‍රියාත්මක වන විට එහි සාර්ථක – අසාර්ථක භාවය තීරණය වනු ඇතැයිද ඔවුහු පැවසූහ
