මෙරට ක්‍රියාත්මක වීමට යෝජිත Starlink චන්ද්‍රිකා සේවාව අත්හිටුවීමට තීරණය කර ඇති බවට පළවන මාධ්‍ය වාර්තා අසත්‍ය බව ශ්‍රී ලංකා විදුලි සංදේශන නියාමන කොමිෂන් සභාව සඳහන් කරයි.
එම කොමිෂන් සභාවේ අධ්‍යක්ෂ ජනරාල් බන්දුල හේරත් පවසන්නේ මෙම සේවාව ලබා දීම සඳහා අවශ්‍ය නියාමනයන් සිදු කෙරෙන Dashboard පද්ධතියක අවශ්‍යතාවයක් පවතින බවත් එම පද්ධතිය මෙරටට ගෙන්වා ගැනීම සඳහා යම් ප්‍රමාදයක් පවතින බවත් ය.
ඒ අනුව අදාළ පද්ධතීන් මෙරටට ලැබුණු වහාම Starlink චන්ද්‍රිකා සේවාව අප්‍රේල් මාසයේ සිට ක්‍රියාත්මක වීමට නියමිත බවත් අධ්‍යක්ෂවරයා පැවසීය.
එහිදී වැඩිදුරටත් අදහස් දැක්වූ එම කොමිෂන් සභාවේ අධ්‍යක්ෂ ජනරාල් බන්දුල හේරත් මෙසේද පැවසීය .
“මම වගකීමෙන් කියනවා එම ආයතනය ලබා දෙන සේවාව නවත්වන්නේ නෑ. අප්‍රේල් මාසයේදී එම සේවාව අප රටට ලබා දීමට නියමිතයි. ඒ වගේම ඔවුන් ලබා දෙන සේවාව නිවැරදිව නියාමනය කිරීම සඳහා සේවාව ලබා ගන්නා පාරිභෝගිකයින්ට අවශ්‍ය සේවාව නිවැරදිව ලබා දෙනවාද කියලා කියන එක සහ රටේ ජාතික ආරක්ෂාව නියාමනය කිරීම සඳහා ඔවුන් විසින් Dashboard එකක් ලබා දෙනවා. ඒ තුළින් අපි කාරණා දෙකම නිවැරදිව නියාමනය කිරීම සිදුකරනු ලබනවා.”
මෙම චන්ද්‍රිකා සේවය හිටපු ජනාධිපති රනිල් වික්‍රමසිංහ විසින් ඊලෝන් මස්ක් හමුවී සිදුකළ පෞද්ගලික ඉල්ලීමක් හරහා මෙරටට ලබාගැනීමට හැකි වූවකි.
