‘1990 සුව සැරිය’ පදනමට නව ගිලන් රථ 95ක් ප්‍රදානයක් ලෙස හිමිව තිබෙනවා.
ඒ අනුව ඉන්දියාවේ TATA Sons (Pvt) Ltd ආයතනය මඟින් ගිලන් රථ 50ක් හා ආසියානු සංවර්ධන බැංකුව මඟින් ගිලන් රථ 45ක් ප්‍රදානයක් වශයෙන් ලබා දීමටත් එකඟතාව පළ කර තිබේ.
2016 වසරේදී යහපාලන රජය සමයේ ඉන්දීය රජයේ ප්‍රදානයක් යටතේ ඉන්දියාවේ පිහිටි TATA Sons (Pvt) Ltd ආයතනයෙන් ලබාගත් ගිලන් රථ 297ක් යොදාගෙන ‘1990 සුව සැරිය පදනම’ ආරම්භ කරනු ලැබුවා.
ශ්‍රී ලංකා රජයෙන් ලබා දුන් ගිලන් රථ 25ක් ද ඇතුළුව මේ වන විට ගිලන් රථ 322ක් මේ සඳහා යොදවා තිබේ. සුව සැරිය පදනමේ ඉලක්කය අනුව, කඩිනමින් සේවය ලබා දීම සඳහා ගිලන් රථ 450ක් සහ උපස්ථ ගිලන් රථ 25ක් අවශ්‍ය බවත් දැනට ගිලන් රථ 150ක හිඟයක් ඇති බවත් හඳුනාගෙන ඇත. ඒ අනුව, එකී ගිලන් රථ ‘1990 සුව සැරිය පදනම’ වෙත ලබා ගැනීමට අවශ්‍ය පියවර ගැනීම සඳහා සෞඛ්‍ය ඇමැති වෛද්‍ය රමේෂ් පතිරණ මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමිව තිබේ.
