ශ්‍රී ලංකාව සහ ඔස්ට්‍රේලියාව අතර පැවැත්වීමට නියමිතව තිබෙන තරග 2කින් යුත් ටෙස්ට් ක්‍රිකට් තරගාවලිය ඕස්ට්‍රේලියාවේ ස්ටීවන් ස්මිත්ට අහිමිවනු ඇති බව වාර්තා වේ.
මේ දිනවල ඕස්ට්‍රේලියාවේ පැවැත්වෙන බිග්බෑෂ් ලීග් තරගාවලියේ තරගයක් අතරතුර පන්දුව විසිකිරීමට යාමේදී ඇති වූ වැලමිට ආබාධයක් හේතුවෙන් මෙලෙස ස්මිත්ගේ ශ්‍රී ලංකා සංචාරය අවිනිශ්චිත වී තිබේ.
ඕස්ට්‍රේලියානු ක්‍රිකට් ආයතනය සඳහන් කර සිටින්නේ ස්මිත් මේ වන විට විශේෂඥ වෛද්‍ය උපදෙස් ලබා ගන්නා බවයි.
ඕස්ට්‍රේලියාවේ නිත්‍ය නායක පැට් කමින්ස් සිය දෙවන දරුවාගේ උපත සහ වළලුකර ආබාධය හේතුවෙන් ශ්‍රී ලංකා සංචාරයෙන් ඉවත්ව සිටින හෙයින් ස්මිත් ශ්‍රී ලංකා සංචාරයේ වැඩබලන නායක ලෙසින් පසුගියදා පත් කර තිබුණි.
දෙරට අතර පළමු ටෙස්ට් තරගය ජනවාරි 29 වන දින ගාල්ලේ දී පැවැත්වීමට නියමිතයි.