වසරක කාලයක් පැවැති ප්‍රේම සම්බන්ධතාවය කිසිදු දැනුම් දීමකින් තොරව හිටිහැටියේම නැවැත්වීමෙන්
කෝපයට පත් පෙම්වතා ගිනි අවි සමග පෙම්වතියගේ නිවසට පැමිණ ඇය පැහැරගෙන යෑමට උත්සාහ කරමින් සිටියදී අද ( 08) අළුයම වලස්මුල්ල පොලිසිය විසින් අත්අඩංගුවට ගෙන ඇත .
මෙලෙස අත්අඩංගුවට ගෙන ඇත්තේ දෙනියාය පිටකන්ද ප්‍රදේශයේ පදිංචි 22 හැවිරිදි තරුණයෙකි
මෙම තරුණයා වලස්මුල්ල වත්තේගොඩ ප්‍රදේශයේ 21 හැවිරිදි තරුණියක සමග වසරක පමණ කාලයක් තිස්සේ ප්‍රේම සබඳතාවක් පවත්වා ඇති බව පොලිසිය පවසයි
කිසිදු දැනුම් දීමකින් තොරව තරුණිය ප්‍රේම සබඳතාවය නැවැත්වීම හේතුවෙන් උරණ වූ පෙම්වතා පිහි දෙකක්, ගල්කටස් වර්ගයේ තුවක්කු දෙකක් සහ වෙඩි බෙහෙත් ප්‍රමාණයක් ද රැගෙන තරුණියගේ නිවසට පැමිණ ඇයව බියගනවා පැහැරගෙන යාමට උත්සාහ කර තිබේ .
ඒ අවස්ථාවේ තරුණිය සහ පවුලේ ඥාතීන් එක්ව පොලිස් හදිසි ඇමතුම් අංශයට දැනුම්දී තිබේ . ඉන් සුළු මොහොතකට පසුව වලස්මුල්ල පොලිසියේ කණ්ඩායමක් පැමිණ තරුණයා අත්අඩංගුවට ගෙන ඇත .
අත්අඩංගුවට පත් තරුණයා අධිකරණය වෙත ඉදිරිපත් කිරීමට නියමිතය