ජපානය විසින් අත්හිටුවා ඇති ඇමරිකානු ඩොලර් බිලියන 1.1 ක් වටිනා ව්‍යාපෘති 13 ක් නැවත ආරම්භ කිරීමට සූදානම් බව විදේශ කටයුතු අමාත්‍ය අලි සබ්රි පවසනවා.
ජනාධිපති මාධ්‍ය මධ්‍යස්ථානයේ පැවති මාධ්‍ය හමුවක් අමතමින් විදේශ අමාත්‍යවරයා කියා සිටියේ පසුගිය දා ජපානය, සිංගප්පූරුව, රුමේනියාව සහ පෝලන්තය යන රටවල තමන් කළ සංචාර ඉතා සාර්ථක වූ අතර ශ්‍රී ලංකාවේ විදේශ ප්‍රතිපත්තිය ශක්තිමත් කිරීමට එය දායක වූ බවයි.
ශ්‍රී ලංකාව තුළ අත්හිටුවා ඇති ජපන් ව්‍යාපෘති නැවත ආරම්භ කිරීම ඇතුළු දිගුකාලීන ගැටලු රැසකට සාර්ථක සාකච්ඡාවලින් පසුව මෙම සංචාරයන් විසඳුම් ලබා දුන් බව අමාත්‍ය සබ්රි කියා සිටියා.
මීට අමතරව, සිංගප්පූරුව සමඟ පැවති සාකච්ඡා වලදී ආයෝජන කෙරෙහි අවධානය යොමු කළ අතර රුමේනියාව සමඟ පැවති සාකච්ඡා නව රැකියා අවස්ථා නිර්මාණය කිරීම අරමුණු කරගනිමින් පැවති බව ඔහු පැවසීය.
ශ්‍රී ලංකාව තුළ තානාපති කාර්යාලයක් පිහිටුවීම සම්බන්ධයෙන් පෝලන්තය සමඟ සාකච්ඡා කළ බව විදේශ අමාත්‍යවරයා වැඩිදුරටත් පැවසීය
“විවිධ රටවල් සමඟ සම්බන්ධීකරණය කිරීම සංකීර්ණ කාර්යයක් බව ඔප්පු වූ නමුත්, අපගේ විදේශ ප්‍රතිපත්තියේ සැලකිය යුතු ජයග්‍රහණයක් වන ණය ප්‍රතිව්‍යුහගත කිරීම සඳහා ඔවුන්ගේ සහයෝගය අපි සාර්ථකව ලබා ගත්තෙමු. මෙම සාර්ථකත්වයට බොහෝ දුරට හේතු වී ඇත්තේ ජනාධිපති රනිල් වික්‍රමසිංහ මහතා ජාත්‍යන්තර සබඳතා කළමනාකරණය කිරීමේ විශේෂඥතාවයි.” යනුවෙන් මෙහිදී අදහස් දක්වමින් අමාත්‍යවරයා කියා සිටියා.