හිටපු ජනාධිපති රනිල් වික්‍රමසිංහ විසින් රුසියාවේ ශාන්ත පීටර්ස්බර්ග් නුවරදී පැවති Valdai Discussion Club හිදී අදහස් දක්වමින් ඊශ්‍රායලය විසින් ඉරානයට එල්ල කරන ලද ප්‍රහාරය ස්වයං-ආරක්ෂාව ලෙස යුක්ති සහගත කරන G7 හි නිවේදනය විවේචනය කර තිබෙන බව වාර්තා වෙයි.
අදාළ ප්‍රහාරය එල්ල වූයේ එක්සත් ජනපදය සහ ඉරානය අතර සාකච්ඡා සිදුවෙමින් පවතින අවස්ථාවක වන බැවින් එය ප්‍රතික්ෂේප කළ යුතු බවද හිටපු ජනාධිපතිවරයා එහිදී සඳහන් කර ඇත.
එහිදී වත්මන් ගෝලීය සන්දර්භය ද පැහැදිලි කරමින් රනිල් වික්‍රමසිංහ හිටපු ජනාධිපතිවරයා පවසා ඇත්තේ එය ගෝලීය අනුපිළිවෙල බිඳ වැටීමක් සහ බහු-ධ්‍රැවීය ලෝකයක නැගීමක් ලෙසයි.
ආසියාව, අප්‍රිකාව, යුරේසියාව සහ ලතින් ඇමරිකාව වැනි බල කණ්ඩායම්වලට අමතරව, රාජ්‍ය නොවන ක්‍රියාකාරීන්, මිලිටරි ක්‍රියාකාරීන් සහ ජාත්‍යන්තර මූල්‍ය අරමුදල (IMF) වැනි බහුපාර්ශ්වික සංවිධාන ස්වරූපයෙන් විකල්ප බල ව්‍යුහයන් මතුවෙමින් පවතින බවද වික්‍රමසිංහ මහතා සඳහන් කර ඇත.
මෙම බලගතු බලවේග ගෝලීය අනුපිළිවෙල හැඩගැස්වීමට වගකිව යුතු බවද ඒ මහතා පවසා තිබේ.
සමුළුවේදී අදහස් දක්වමින් හිටපු ජනාධිපතිවරයා තවදුරටත් පවසා තිබෙන්නේ ඉන්දු-පැසිෆික් කලාපය පැසිෆික් සාගරයේ පැහැදිලි සීමාවක් නොමැති වීමෙන් ඇති වූවක් බවයි. එය තායිවාන අර්බුදය සමඟ කටයුතු කිරීමේ අරමුණින් නිර්මාණය වූවක් බවත්, තායිවානය චීනයේ කොටසක් ලෙස පිළිගෙන ඇති බැවින් ඉන්දියානු සාගරයට මෙම ගැටලුවට සම්බන්ධ වීමට කිසිදු කැමැත්තක් නොමැති බවයි.
