මාධ්‍යවේදී ප්‍රගීත් එක්නැලිගොඩ පැහැර ගෙන ගොස් ඝාතනය කිරීම සම්බන්ධයෙන් විභාග කෙරෙමින් පවතින නඩුවේ සාක්ෂිකරුවන්ට තර්ජනය කළ බවට සැකපිට බ්‍රිගේඩියර් (විශ්‍රාමික ) ශම්මි කුමාර යන අය අත්තඩංගුවට ගෙන ඇති බව වාර්තා වෙයි.
සාක්ෂිකරුවන්ට තර්ජනය කිරීම සඳහා භාවිතා කළ ජංගම දුරකතනයේ දත්ත පරීක්ෂා කිරීමෙන් පසුව, අදාළ අත්තඩංගුවට ගැනීම සිදුකර ඇති අතර අනතුරුව ඔහුව ඊයේ (11) ත්‍රිකුණාමලය මහේස්ත්‍රාත් අධිකරණයට ඉදිරිපත් කර තිබේ.
එහිදී සැකකාර විශ්‍රාමික බ්‍රිගේඩියර්වරයා ලබන 25 දින දක්වා රක්ෂිත බන්ධනාගාර ගත කිරීමට නියෝග කර තිබේ.
2010 ජනවාරි 24 වනදා මාධ්‍යවේදි ප්‍රගීත් එක්නැලිගොඩ අතුරුදහන් වූ අතර වාර්තා වන ආකාරයට මෙතෙක් පැවති විමර්ශන වලදී අනාවරණයවී ඇත්තේ, ඔහුව පැහැරගෙන ගොස් ඝාතනය කර ඇති බවයි.
