Home Hit IPL ඉතිහාසයේ වැඩිම ලංසුව ක්‍රිස් මොරිස්ට හිමිවෙද්දී ශ්‍රී ලංකා ක්‍රීඩකයින්ගේ ඉරණම

IPL ඉතිහාසයේ වැඩිම ලංසුව ක්‍රිස් මොරිස්ට හිමිවෙද්දී ශ්‍රී ලංකා ක්‍රීඩකයින්ගේ ඉරණම

338
0

IPL තරගාවලියේ ක්‍රීඩක වෙන්දේසිය ඊයේ(18) පස්වරුවේ චෙන්නායිහී දී පැවැත්වුණා.

උපරිම වශයෙන් ක්‍රීඩකයින් 61 දෙනෙකු තෝරා ගැනීම වෙනුවෙන් මෙම වෙන්දේසිය ඊයේ දිනයේ දී පැවැති අතර, වෙන්දේසිය අවසන් වන විට සියලු කණ්ඩායම් විසින් තම කණ්ඩායමට තෝරා ගත හැකි උපරිම විදෙස් ක්‍රීඩකයින් ප්‍රමාණය මිලදී ගෙන තිබුණා.

වෙන්දේසියේ දී වැඩිම මිලකට අලෙවි වූයේ පසුගිය වසරේ දී රෝයල් චැලෙන්ජර්ස් බැංගලෝර් කණ්ඩායම නියෝජනය කළ දකුණු අප්‍රිකානු තුන් ඉරියව් ක්‍රීඩක ක්‍රිස් මොරිස්.

ඔහුව රාජස්ථාන් රෝයල්ස් කණ්ඩායම විසින් ඉන්දීය රුපියල් කෝටි 16.25ක මුදලකටයි මිලදී ගනු ලැබුවේ.

එය IPL ඉතිහාසයේ ක්‍රීඩකයෙකු අලෙවි වූ ඉහළම මිල වන අතර, මීට පෙර වැඩිම මිලකට ක්‍රීඩකයෙකු අලෙවි වී තිබුණේ 2015 වසරේ දී යි.(දිල්ලි කණ්ඩායම විසින් යුවරාජ් සිං ඉන්දීය රුපියල් කෝටි 16කට මිලදී ගෙන තිබුණා.)

ඊයේ පැවැති ක්‍රීඩක වෙන්දේසියේ දී නවසීලන්තයේ ක්යිල් ජමිසන් ඉන්දීය රුපියල් කෝටි 15ක මුදලකට රෝයල් චැලෙන්ජර්ස් බැංගලෝර් කණ්ඩායම විසින් මිලදී ගැනීම ද විශේෂත්වයක්.

ඊට අමතරව ඔවුන් විසින් ඔස්ට්‍රේලියානු තුන් ඉරියව් ක්‍රීඩක ග්ලේන් මැක්ස්වෙල් රුපියල් කෝටි 14.25 ක මුදලකට මිලදී ගනු ලැබුවා.

ක්‍රීඩක වෙන්දේසියේ දී සිව්වැනි ඉහළම මිලට අලෙවි වූ ක්‍රීඩකයා බවට පත් වූයේ ඔස්ට්‍රේලියාවේ ජයි රිචර්ඩ්සන්.

ඔහුව පන්ජාබ් කිංග්ස් කණ්ඩායම විසින් රුපියල් කෝටි 14ක මුදලකට මිලදී ගත්තා.

මෙවර වෙන්දේසියේ දී වැඩිම මිලකට අලෙවි වූ ඉන්දීය ක්‍රීඩකයා වන්නේ ක්‍රිෂ්නප්පා ගෞතම්.

32 හැවිරිදි ඔහුව චෙන්නායි සුපර් කිංග්ස් කණ්ඩායම විසින් කෝටි 9.25ක මුදලකට මිලදී ගනු ලැබුවා.

මෙම ක්‍රීඩකයින් පස් දෙනා මිලදී ගැනීම සදහා පමණක් ඒ ඒ කණ්ඩායම් විසින් වියදම් කරනු ලැබූ මුදලෙහි එකතුව ඉන්දීය රුපියල් කෝටි 70කට ආසන්නයි.

කෙසේ වෙතත් එහිදී කිසිදු ශ්‍රී ලංකා ක්‍රීඩකයෙකු මිලදී ගැනිමට කිසිදු කණ්ඩායමක් ඉදිරිපත් වූයේ නැහැ.

ශ්‍රී ලංකා ක්‍රීඩකයින් 9 දෙනෙකු වෙන්දේසිය සදහා ඉදිරිපත් කෙරෙන බවට මීට පෙර ප්‍රකාශ කර තිබුණ ද වෙන්දේසිය සදහා ඉදිරිපත් කෙරුණේ ක්‍රීඩකයින් තිදෙනෙකු පමණයි.

එනම්, කුසල් පෙරේරා, තිසර පෙරේරා සහ ඉසුරු උදාන යන ක්‍රීඩකයින්.

නමුත් ඔවුන්ගෙන් කිසිවකු අලෙවි වූයේ නැහැ.

LEAVE A REPLY

Please enter your comment!
Please enter your name here