Home Health හිමොග්ලොබින් අඩු ගැබිණි මවක් පිළිපැදිය යුතු පෝෂණ අවශ්‍යතා

හිමොග්ලොබින් අඩු ගැබිණි මවක් පිළිපැදිය යුතු පෝෂණ අවශ්‍යතා

1618
0

අද වන විට රුධිරගත හිමොග්ලොබින් ප‍්‍රමාණය අවම වීම ගැබිනි මව්වරුන් අතර සුලබව දැකිය හැකි තත්ත්වයක්ව පවතිනවා. සාමාන්‍යයෙන් අපේ සිරුරේ පටක සඳහා අවශ්‍ය වන ඔක්සිජන් ප‍්‍රවාහනය කිරීමේ කාර්යභාරය සිදුවන්නේ මේ හරහායි. යම් හෙයකින් රුධිරගත හිමොග්ලොබින් ප‍්‍රමාණය අවම වීම ගැටලු රැසකට මුල් විය හැකියි. රුධිරගත හිමොග්ලොබින් ප‍්‍රමාණය අඩු වීමට මූලික මෙන්ම වැඩිපුරම හේතු විය හැකි සාධකය ලෙස දැක්විය හැකිකේ යකඩ ඌනතාවයයි.

යකඩ ඌනතාවයට අමතරව රුධිරගත හිමොග්ලොබින් අඩු විය හැකි අවස්ථා :

  • ෆෝලික් ඇසිඞ් විටමිනය අවම වීම
  • නිසි පෝෂණය නොලැබීම
  • තැලසීමියා වාහකයෙකු වීම
  • පණු රෝගවලට ගොදුරු වූවෙකු වීම
  • ලියුකේමිය වැනි රෝග තත්ත්වයන්ට ගොදුරු වීම

යකඩ ඌනතාවය හේතුවෙන් රුධිරගත හිමොග්ලොබින් මට්ටම අවම වූ ගැබිනි මවක් තම ආහාර රටාව සකස් කර ගැනීමේදී විශේෂ අවධානයක් යොමු කළ යුතුයි. ඔවුන් සැමවිටම තමන් ලබාගන්නා යකඩ ප‍්‍රමාණය නිසි ආකාරයෙන් සිරුරට අවශෝෂණය කරගැනීම සම්බන්ධයෙන් සැලකිලිමත් වීම ඉතා වැදගත් වනවා. උදාහරණයක් ලෙස යකඩ ලබාගන්නේ ප‍්‍රධාන කෑම වේල් ආශ‍්‍රිතව නම් ඒ ලබාගත් යකඩ ආහාර සමග ප‍්‍රතික‍්‍රියා කිරීම නිසා නිසි ලෙස සිරුරට අවශෝෂණය වීමක් සිදු වන්නේ නැහැ. මේ හේතුව මත යකඩ පෙති ලබාගැනීමේදී ඒවා හිස්බඩ ලබාගන්නා ලෙස වෛද්‍යවරුන් උපදෙස් ලබාදෙන්නේ එවිට යකඩ වැඩි ප‍්‍රමාණයක් සිරුරට අවශෝෂණය වන නිසයි. එවිට රුධිරගත හිමොග්ලොබින් ප‍්‍රමාණය ඉහළ යයි.

රුධිරගත හිමොග්ලොබින් ප‍්‍රමාණය අවම මව්වරුන් සඳහා යකඩ පෙති 02 බැගින් ලබාගන්නා ලෙස වෛද්‍යවරුන් නිර්දේශ කරනු ලබනවා. එසේම යකඩ පෙත්ත සමග විටමින් C ලබාගැනීමට උපදෙස් ලබා දෙන්නේ එහි ඇති ආම්ලික ස්වභාවය යකඩ අවශෝෂණය ඉහළ දමන බැවින්. එසේම කැල්සියම් පෙත්ත හා යකඩ පෙත්ත එකට ලබා නොගන්නා ලෙසත් ගැබිනි මව්වරුන්ට වෛද්‍යවරු උපදෙස් ලබාදෙන්නේ එමගින්ද යකඩ අවශෝෂණය අඩාල කිරීම හේතුවෙනුයි.

යකඩ ඌනතාවය හේතුවෙන් රුධිරගත හිමෝග්ලොබින් ප‍්‍රමාණය අවම වීම සඳහා සැමවිටම සමබල ආහාර වේලක් ලබාගත යුතුයි.

යකඩ බහුල ආහාර වර්ග අතරින් පහසුවෙන් අවශෝෂණය වන යකඩ අඩංගු රතු පැහැති මස්/මාළු/පීකුදු යන මාංශ ආහාර වර්ග, බිත්තර, සෝයා බෝංචි, ධාන්‍ය වර්ග සහ කතුරුමුරුංගා සහ මුරුංගා කොළ පැහැති පලා වර්ග ගැබිනි මවගේ ආහාර වේලට එක්කිරීම වඩාත් සුදුසුයි. ඔබ නිර්මාංශ ගැබිනි මවක් නම් යෝගට්, කිරි, මී කිරි වැනි දේ ආහාරයට ලබා ගැනීම වඩාත් සුදුසු වන අතර රුධිරගත හිමොග්ලොබින් අවම ගැබිනි මවකට ආහාර සැකසීමේදී මේ උපදෙස් පිළිපැදීමෙන් ඇයගේ සිරුරට යකඩ අවශෝෂණය හොඳින් සිදු වනු ඇති.

  • මස්/මාළුවලට සියඹලා, ගොරකා වැනි ඇඹුල් දේ එක් කරන්න.
  • මැල්ලුම් වර්ග සෑදීමේදී නිවුණු පසු දෙහි ස්වල්පයක් එක් කරගන්න.
  • ආහාර වේලෙන් පසුව විටමින් ක්‍ බහුල පළතුරු ආහාරයට ලබාදෙන්න.
  • ආහාර ගත විගස එනම් පැය දෙක තුනක්වත් යාමට පෙර පසු තේ/කෝපි වැනි යකඩ අවශෝෂණයට බාධා කරවන පාන වර්ග ලබානොගන්න.

උතුරු කොළඹ ශික්ෂණ රෝහලේ ප‍්‍රසව හා නාරි විශේෂඥ වෛද්‍ය ටිරාන් ඩයස් මහතා සමග සකසන ලද ලිපියකි.

LEAVE A REPLY

Please enter your comment!
Please enter your name here