Home Hit ”මල්ලි ඇතුළු වී මෝල් හිමියන් ලබන ලාභය සාධාරණ නෑ” – ජනපති

”මල්ලි ඇතුළු වී මෝල් හිමියන් ලබන ලාභය සාධාරණ නෑ” – ජනපති

1257
0

තමාගේ සහෝදරයා ඇතුළු වී මෝල් හිමියන් ගොවියාගෙන් වී මිලදී ගන්නා විටත් ඒවා සහල් බවට පත් කර වෙළදපොළට දාන විටත් උපයා ගන්නේ සාධාරණ ලාභයක් නොවේ යැයි ජනාධිපති මෛත්‍රීපාල සිරිසේන පවසනවා.

ජනාධිපතිවරයා මේ බව සඳහන් කළේ ඊයේ (11) බත්තරමුල්ල, අපේ ගම පරිශ්‍රයේ පැවති හමුවකදීයි.

වී මෝල් හිමි සහෝදරයා ගැන මිස අනික් මෝල් හිමියන් ගැන තමා නොබලන බවට ඇතැමුන් චෝදනා කළත් තමන්ගේ සහෝදරයා ගැන දන්නේ තමා යැයි කී ජනාධිපතිවරයා ඔහු තමාට එක රුපියලක් වත් ඉල්ලා ගත හැකි පුද්ගලයකු නොවේ යැයි ද කියා සිටියා.

එහිදී වැඩිදුරටත් අදහස් දැක්වූ ජනාධිපතිවරයා,

”සමහර අයගේ මතයක් තියෙනවා මගේ සහෝදරයා මේ රටේ ලොකුම වී මෝලක් තිබෙන කෙනෙක් නිසා මම බලන්න එයා ගැනයි කියලා. මට මතකයි මගේ සහෝදරයාගේ දැන් ඔය ලොකු වී මූණ තියෙන තැන පොඩි වී මෝලක් තිබුණේ, ගම්පහ පැත්තේ ව්‍යාපාරික මහත්තයෙකුගේ අවුරුදු 25 කට එහා. මගේ සහෝදරයා ඒ වී මෝල මිලදී ගත්තා. ඔහු මට කිව්වා අයිය ඇවිත් බලන්න මම වී මෝල ගත්තා කියලා. එදා මම ඒක බලන්න ගියා. හැබැයි එදායින් පස්සේ මම ඔය විමනේ ගේට්ටුවෙන් ඇතුලට ගිහින් නැහැ. විශේෂයෙන් ඡන්ද කාලයේදී දේශපාලන ප්‍රතිවාදීන් කියන කතාවක් තමයි මෛත්‍රිපාලගේ සල්ලි තමයි ඩඩ්ලි ගාව තියෙන්නේ කියලා. වී මෝල්, ෆයිස්ටාර් හොටෙල් මේ ඔක්කොම එයාගේ සල්ලි තමයි සහෝදරයා ගාව තියෙන්නේ කියලා කියනවා. තමුන්නාන්සේලා මගේ සහෝදරයාගේ හැටි දන්නේ නැහැ. මට එක රුපියලක්වත් ඒ මිනිහගෙන් ඉල්ල ගන්න පුළුවන් මිනිහෙක් නෙවෙයි, ඒක තමයි ඇත්ත තත්වය.

වී මෝල් හිමියන් ලෙස තමුන්නාන්සේලාගේ යම් සැකයක් තියෙන්න පුළුවන් තමුන්නාන්සේලාට උදව් කරන්නෙ නැහැ මම ඉන්නේ සහෝදරයගෙ පැත්තෙ කියලා. නමුත් මම පැහැදිලිව කියනවා මම ඉන්නේ ගොවියාගේ පැත්තෙ. මේ රටේ මගේ සහෝදරයාත් එක්ක වී මෝල් ක්ෂේත්‍රයේ ඉන්න අය ගොවියාගේ වී ටික මිලට ගන්න විටත් ඒවා සහල් බවට පත්කර වෙළඳ පොලට දාන විටත් සාධාරණ ලාභයක් නොවෙයි ගන්නේ, ඒක මම දන්නවා.

මම ඔය එක පැත්තකවත් කෙනෙක් නොවෙයි. මම මේ දේශපාලනයට ඇවිත් මේ කිසිදේකට සම්බන්ධ නැතිව මගේ දේශපාලන ජීවිතය ගොඩනගා ගත්ත නිසයි අද මේ තත්වයේ ඉන්නේ.” යනුවෙන් සඳහන් කර සිටියා.

ආරියරත්න රණබාහු

LEAVE A REPLY

Please enter your comment!
Please enter your name here