Home Hit අගෝස්තු පහ නව සංධානයක් : රනිල් – පාඨලී – වෙල්ගම අලුත්...

අගෝස්තු පහ නව සංධානයක් : රනිල් – පාඨලී – වෙල්ගම අලුත් මාවතකට

773
0

ශ්‍රී ලංකා නිදහස් පක්ෂයෙන් සහ ශ්‍රී ලංකා පොදුජන පෙරමුණෙන් ඉදිරි මැතිවරණවලට ඉදිරිපත් වීමට නොහැකි පාර්ලිමේන්තු මන්ත්‍රීවරුන් එක්සත් ජාතික පක්ෂය බලයට ගෙන ඒම සඳහා නව සන්ධානයක් බිහි කිරීමට සැලසුම් කර ඇත.

ජනාධිපති මෛත්‍රීපාල සිරිසේන මහතාද නොදැනුවත්ව ශ්‍රී ලංකා නිදහස් පක්ෂයේ මන්ත්‍රීවරුන් පිරිසක් මේ සඳහා පෙරමුණ ගෙන තිබේ. එක්සත් ජාතික පක්ෂය ඇතුළු මුස්ලිම් සහ දෙමළ දේශපාලන පක්ෂද එකතු කර ගනිමින් නව සන්ධානය බිහි කරන අතර එහි මූලික සාකච්ඡා මේ වන විටත් ආරම්භ කර ඇත. මෙහිදී ශ්‍රී ලංකා නිදහස් පක්ෂය නියෝජනය කරමින් කළුතර, කොළඹ, අනුරාධපුරය යන දිස්ත්‍රික්කවලින් පාර්ලිමේන්තුවට තේරීපත් වූ මන්ත්‍රීවරුන් තිදෙනකු පෙරමුණ ගෙන ඇත.

නව සන්ධානයට ශ්‍රී ලංකා නිදහස් පක්ෂය සුරැකීමේ සංවිධානයේද සහාය හිමිව තිබේ. එම සංවිධානයට ශ්‍රී ලංකා පොදුජන පෙරමුණෙන් ඉවත් කළ පාර්ලිමේන්තු මන්ත්‍රී කුමාර වෙල්ගම මහතාගේ සහයෝගය ලබා ගැනීමටද සාකච්ඡා ආරම්භ කර ඇත. හිටපු නගරාධිපතිවරයකුගේ බත්තරමුල්ලේ පිහිටි නිවසක මූලික සාකච්ඡා පවත්වා තිබේ. ඉන්පසු පාර්ලිමේන්තු මන්ත්‍රී කුමාර වෙල්ගම මහතා සමගද රොස්මිඩ් පෙදෙසේ පිහිටි නිවසක සාකච්ඡා පවත්වා ඇති අතර එම නිවස මන්ත්‍රීවරයාගේ සමීපතම හිතවතියකගේ වෙයි.

මෙම සංධානය බිහිකිරීමේ ක්‍රියාදාමය පසුපස ජාතික හෙළ උරුමයේ මහලේකම් අමාත්‍ය පාඨලී චම්පික රණවක විශේෂ කාර්‍යභාරයක් සිදුකරමින් සිටින අතර එම සංධානයේ ප්‍රතිපත්ති ප්‍රකාශය සැකසීමේ කාර්‍යයද ඔහු විසින් සිදුකරනු ඇති බවයි වාර්තා වන්නේ.

ජනාධිපතිවරණය සහ මහ මැතිවරණය ඉලක්ක කර ගනිමින් නව සන්ධානය බිහි කරන අතර එය අගෝස්තු මස 05 වන දින ප්‍රකාශයට පත් කිරීමට තීරණය කර තිබේ. කොළඹ සුගතදාස ක්‍රීඩාංගණයේ පැවැත්වෙන උත්සවයකදී නව සන්ධානය ප්‍රකාශයට පත් කරන අතර එහි නම වන්නේ ජාතික ප්‍රජාතන්ත්‍රවාදී පෙරමුණයි. එම සන්ධානය සඳහා සලකුණක් මෙතෙක් තෝරා ගෙන නොමැති අතර සලකුණු කිහිපයක් මැතිවරණ කොමිෂන් සභාව වෙත ඉදිරිපත් කර ඇත.

LEAVE A REPLY

Please enter your comment!
Please enter your name here