Home Local විදුලියේ ලොකු පුටු හෙල්ලෙයි

විදුලියේ ලොකු පුටු හෙල්ලෙයි

329

විදුලිබල මණ්ඩලයේ, අමාත්‍යාංශයේ සහ මහජන උපයෝගිතා කොමිසමේ විදුලි බල මාෆියාවට සම්බන්ධ නිලධාරීන් සම්බන්ධයෙන් දැඩි ක්‍රියාමාර්ග ගැනීම කෙරෙහි රජයේ අවධානය යොමුව ඇති අතර නිලධාරීන් කිහිප දෙනකු වෙනුවට වෙනත් අය පත් කිරීම කෙරෙහි මේ වන විටත් අවධානය යොමු වී තිබෙනවා.

එසේම විදුලි මාෆියාව මඟින් සිදුකළ මහා පරිමාණ වංචා සම්බන්ධයෙන්ද මේ වන විට පරීක්ෂණ පවත්වනු ලබනවා.

ජනතාවට අඛණ්ඩව විදුලි බලය සැපයීමට නොහැකි වී ඇත්තේ විදුලිය සම්බන්ධ ඉංජිනේරුවන්ගේ හා නිලධාරීන්ගේ නොසැලකිල්ල හා තමන්ට වාසි සහගත කොමිස් කෙරෙහි අවධානය යොමුකිරීම නිසා බව මේ වන විට හෙළිව තිබෙනවා.

විදුලි අර්බුදය පිළිබඳ සොයා බැලීමට මේ වන විටත් රවි කරුණානායක, කබීර් හෂීම් හා ආචාර්ය හර්ෂ ද සිල්වාගෙන් යුත් කමිටුවක්ද පත් කර ඇති අතර පසුගිය වසර 04ක කාලය තුළ විදුලි බලය වැඩිදියුණු කිරීම හෝ හදිසි විදුලි බිඳවැටීම් සම්බන්ධව කිසිදු ප්‍රතිපත්තිමය ක්‍රමවේදයක් සකස් කිරීමට මණ්ඩලයේ හෝ අමාත්‍යාංශයේ නිලධාරීන් හා ඉංජිනේරුවන් කටයුතු නොකිරීම නිසා විදුලි බල අර්බුදයක් හටගෙන ඇති බව මේ වන විට ජනාධිපතිවරයාට හා අගමැතිවරයාට වාර්තා වී තිබෙනවා.

ඒ සම්බන්ධව විමර්ශනය කිරීමෙන් පසු ජනාධිපතිවරයා විසින් මණ්ඩලයට හා මහජන උපයෝගිතා කොමිසමට දැඩි සේ දොස් පවරා ඇතැයි ද සඳහන්.

එසේම ජපානයෙන්, චීනයෙන් හා ඉන්දියාවෙන් අපට ලැබුණු LNG බලාගාර ස්ථාපිත කිරීමටද නිලධාරීන් නිසි පියවර නොගැනීම නිසා මේ තත්ත්වය වැඩිදුරටත් උග්‍ර අතට පත්ව ඇති බවත්, එහි සපූර්ණ වගකීම නිලධාරීන් බාරගත යුතු බවත් අගමැතිවරයා පසුගියදා පෙන්වා දුන්නා.

හදිසි අවශ්‍යතාවකදී භාවිතයට ගැනීම පිණිස විදුලි උත්පාදන යන්ත්‍ර 50ක් 2018 වසරේ දෙසැම්බර් 18 වනදා මෙරටට ගෙන්වන ලද අතර, එයින් 20ක් මතුගම හා තවත් 20ක් කොළොන්නාවේද, ඉතිරි 10 තුල්හිරියේද ස්ථාපිත කළ නමුත් මේ වන තෙක් මතුගම විදුලි උත්පාදන යන්ත්‍ර පරීක්ෂණ මට්ටමින් හෝ ක්‍රියාත්මක කර නොමැත.

එසේම කොළොන්නාවේ එක් අදියරක බලාගාර 10ම ක්‍රියාත්මක කර නැති අතර, ඉතිරි 10 එංජින් තෙල් අවසන් වීම හේතුවෙන් ක්‍රියාත්මක කර නොමැත.

තුල්හිරියේ විදුලි උත්පාදන යන්ත්‍රද ක්‍රියාත්මක කර නොමැති අතර සමස්ත රටේ විදුලි අවශ්‍යතාව මෙ.වො. 2600ක් වන අතරම, මේ තත්ත්වය විදුලි උත්පාදන යන්ත්‍රද උපයෝගි කරගෙන ඉතා පහසුවෙන් ලබාදිය හැකි මට්ටමක තිබුණද නිලධාරීන් හා ඉංජිනේරුවන් අතර ඇති මේ කඹ ඇදිල්ල නිසා විදුලි බල අර්බුදය ඉතා උග්‍ර අතට හැරීමට ඉඩ ඇතැයිද වෘත්තීය සමිති පෙන්වා දෙනු ලබනවා.

තාරක වික්‍රමසේකර

LEAVE A REPLY

Please enter your comment!
Please enter your name here